Die Hoërskool Sentraal se aanlynkoerant poog om sy lesers met vars nuus op die hoogte van sake te hou. Daar word oor ’n groot verskeidenheid onderwerpe verslag gedoen. Die berigte spreek van ’n hoogstaande gehalte, en Tralietrots word voorop gestel.

Hou jy daarvan om met woorde te toor? Is ’n kamera dalk deel van jou daaglikse uitrusting? Geniet jy dit om kreatief en skeppend te wees? Dan is die Tralie Varia jou tweede tuiste.

Die redaksie bestaan uit ’n groep uiteenlopende persoonlikhede waar elkeen die geleentheid kry om sy of haar stempel af te druk. Die redaksielede voer onderhoude, skryf, en redigeer berigte onder leiding van ’n groep onderwysers wat passievol joernalistieke vaardighede onder die leerders kweek.

Die kernredaksie poog om die standaard en kwaliteit van elke berig te verhoog om sodoende geloofwaardige nuus, wat Tralietrots uitstraal, te lewer.

Die Tralie Varia het die afgelope paar jaar puik prestasies behaal met betrekking tot die Media 24 Nasionale Skoolkoerantkompetisie. In 2010 behaal die koerant ’n 5e-plek, in 2011 en 2012 die 2e-plek en in 2013 maak die koerant geskiedenis deur die kompetisie te wen. Tydens 2014 se kompetisie beklee die koerant ’n 1e-plek in die Vrystaat en ’n 3e-plek nasionaal. In 2015 is die Tralie Varia weer onder die top 10 skoolkoerante aangewys. In 2016 word dié kompetisie uitgestel na 2017.

Die eerste uitgawe van 2017 was ’n reuse sukses. Die gedrukte kopie het ’n 5e-plek in OnsKan24 en Media24 se Nasionale Skoolkoerantkompetisie behaal. Dit spreek van harde werk, deursettingsvermoë en Tralietrots.

Talie Varia is gevolglik na die prestige Excelllence in Education Awards (26 Oktober) in Sandton genooi. Tydens dié geleentheid word die Tralie Varia as die nasionale wenner van die digitale afdeling van dié kompetisie aangewys. Volgens me. Elize Engelbrecht (projekkoördineerder) het die beoordelaars die Tralie Varia geprys vir die navolgenswaardige voorbeeld wat die digitale koerant vir ander skoolkoerante stel. Die koerant is veral geprys vir die lewendige skakels na berigte wat op die lesersmark van toepassing is.

In 2018 wen die Tralie Varia die digitale afdeling van die Volksblad se skoolkoerantkompetisie. Die beoordelaars sê hulle is uit die veld geslaan deur die puik digitale weergawe. Wat die gedrukte uitgawe betref is daar spesiale vermelding gemaak van die Tralie Varia. Die beoordelaars beskryf die koerant as lekker lewendig en vol opbouende inhoud. Hul sê verder dit is ’n puik koerant met puik uitleg, baie goeie nuus en fotoaanbod wat getuig van harde werk.

Covid-19 het in 2020 ook die Tralie Varia genoodsaak om te verander. Die koerant is vanjaar vir die eerste keer slegs digitaal uitgegee. Die voordeel hieraan verbonde, is dat die koerant ’n wyer teikenmark kan bereik. Die redaksie het gedurende die inperking skouer aan die wiel gesit, en ’n spesiale Covid-19-uitgawe het in September die lig gesien.

Die Tralie Varia is in 2021 ’n finalis in netwerk 24 se skolenuus kompetisie, en eindig onder die top vier skoolkoerante in die land. Die Tralie Varia is ook die naaswenner in kategorie4: innovasie: Covid 19-inperking.

Die Tralie Varia is in 2022, tydens Netwerk 24 se skolenuus kompetise, in verskeie kategorieë genomineer: Beste uitleg:gedrukte skoolkoerant en Beste gebruik van ’n video.

Die aanlynkoerant kon egter nie ingeskryf word vir die digitale afdeling van die kompetisie nie, omrede die webtuiste “ge-hack” is. Dit was ‘n groot terugslag vir die redaksie aangesien maande se harde werk uitgewis is.

In 2023 besluit die redaksie om ‘n nuwe aanlynkoerant te begin. Na baie hardewerk is dié droom verwesenlik.

Amélie Moorcroft (graad 12) is ook in die Netwerk24 skolenuuskompetisie vir die beste spotprent genomineer.

In 2024 presteer die Tralie-mediaspan puik in die Netwerk24 skolenuuskompetisie. Sentraal wen die afdeling vir die beste Instagram-blad. Nicola van der Wath (graad 11) is genomineer onder die top 3 vir haar sportberig. Sentraal word ook genomineer onder die top 3 vir die beste gebruik van ’n video op sosiale mediaplatforms.

Dit is vir die Tralies ’n groot eer om in die Tralie Varia te verskyn. Die Tralie Varia is die trots agter elke suksesvolle leerder, en verryk in die proses hulle drome. Elke uitgawe is die spieëlbeeld van die toekoms van die Hoërskool Sentraal.